HETELen eta ACFPIren (LHko itunpeko ikastetxeen Kataluniako elkartea) arteko lankidetzaren esparruan, prestakuntza-bisita bat antolatu da Katalunian, Euskadiko irakasle-talde batentzat. Ekimen honen helburua da inklusioaren eta aniztasunarekiko arretaren inguruan dituzten ikuspegiak eta esperientziak zuzenean ezagutzea, eremu horretan hezkuntza-kalitatean hobekuntzak aplikatzeko. Bisita oso positiboa izan da eta maleta ideia berriez beteta ekarri da. Abantean!
Kategoria: Albisteak
Oinarrizko LHko titulazioa duten pertsonen laneratzea hobetzeko lanean
Oinarrizko Mailako Lanbide Heziketa funtsezko aukera da hezkuntza-sistema tradizionalean zailtasunak dituzten gazteentzat. Hala ere, kolektibo horren laneratzea erronka bat da, HETELen azken laneratze txosteneko datuek erakusten duten bezala. Horregatik, HETELen saiatu gara Bizkaiko Foru Aldundiko Enplegu, Gizarte Kohesio eta Berdintasun Sailaren laguntzari esker lan-merkaturako sarbidean eragiten duten aldagaiak aztertzen. Lehenik eta behin, Bizkaiko 11 HETEL ikastetxeetako (San Viator, Somorrostro Ikastetxea, Peñascal, Otxarkoaga, Salesianos Deusto, Margotu, María Inmaculada, Ángeles Custodios, Maristak Zalla, Maristak Durango eta Zulaibar) oinarrizko LHko ikasleen diagnostikoa egin da. 1. Oinarrizko LH maskulinizatuta dagoen maila da 2. Hizkuntza-oztopo gero eta handiagoa 3. Hezkuntza-premia bereziak 4. Hazkuntzan dagoen kalteberatasun sozioekonomikoa Diagnostikoak agerian uzten du prestakuntza-eskaintza eta laguntza-baliabideak egokitu egin behar direla Oinarrizko Lanbide Heziketako ikasleen errealitatera. Funtsezkoa da inklusioa sustatuko duten, hizkuntza-oztopoak murriztuko dituzten eta gizarte- eta hezkuntza-arloko laguntza indartuko duten estrategiak diseinatzea, gazte horiei lan-mundurako trantsizioa errazte aldera. Gainera, enpresa bat aukeratzeko orduan pertsona horiek dituzten lehentasunak aztertu dira, eta honako hauek izan dira: lehenik eta behin, kokapena, lan-baldintzak, bigarrenik, eta, hirugarrenik, faktore ekonomikoa. Bi diagnostiko horien (gizarte- eta hezkuntza-arlokoak eta lehentasunekoak) ondorioak kontuan hartuta, enpresek ikasle horien profilera edo lehentasunetara egokitzeko egin ditzaketen jarduera potentzialak zehaztu ziren (zereginak egokitzea, hizkuntza erraza erabiltzea, konfiantzazko pertsona edo tutorea izatea, ordutegiak garraio publikora egokitzea…). Jarduera horiek inprimaki sinple batean jaso ondoren, 100 enpresa baino gehiago bisitatu dira galdetegia osatzeko eta enpresak pertsona horien profilera eta lehentasunetara zenbateraino egokitzen diren jakiteko. Azterketa horren emaitza nahiko positiboa izan da, horrelako ikasleak hartzen dituzten enpresak bisitatu direlako eta, beraz, nahiko sentsibilizatuta daudelako. Orain, jardunbide egokiak detektatzea eta Euskadiko enpresa guztientzako jarduera-eskuliburu bat ezartzen saiatzea dagokigu, baita administrazio publikoentzako gomendioak ere. Abantean! Gai horiei buruz hitz egin dugu HETEL Telebistako atal hauetan, Julen Elgetak, HETELeko presidenteak, Susana González Bizkaiko Foru Aldundiko Enplegu zuzendaria eta Roberto García Peñascal ikastetxeko zuzendaria elkarrizketatu ditu. Informazio gehiago: 1 atala 2 atala
Network of Networks nazioartekotze taldea Bilbon bildu da
Lanbide Heziketako ikastetxe sareen sareko nazioarteko lantaldea, Network of Networks, Bilbon bildu da datorren ikasturtean egingo den ikasle-trukea prestatzeko. Bilbo harrera hiri izango duen esperientzia pilotu honetan, Holanda, Finlandia, Irlanda, Eskozia, Ipar Irlanda eta Euskadiko erdi mailako 30 bat ikaslek parte hartuko dute, 10 irakaslerekin batera. Landuko duten gaia EBren balioetako batekin lotuta egongo da, giza eskubideekin, zehazki, hainbat faktoreren araberako diskriminazioarekin (generoa, etnia edo sexu-orientazioa), eta diskriminazio horrek enpresetako praktiketan eta lan-proiekzioan duen eraginarekin. Gainera, nazioartekotze-taldeak Erasmus+ “Jean Monnet Networks” deialdirako etorkizuneko proposamen batean lan egin du egun hauetan, Europako balioak eta politikak lanbide–heziketaren testuinguruan lantzeko. Bi egun oso emankorrak izan dira!
Nazioarteko esperientzien ekarpena, Oinarrizko Lanbide Heziketa indartzeko
Maristak Zallako bi irakaslek HETELek antolatutako Erasmus+ mugikortasun batean parte hartu dute, Lanbide Heziketako praktika egokiak ezagutzeko helburuarekin. Egonaldian, herrialdeko erreferentziazko hiru ikastetxe bisitatu zituzten: Yuverta, Rijn IJssel eta Albeda, guztiak erreferenteak Lanbide Heziketan eta oinarrizko mailako ikasleei arreta berezia eskainitzen dietenak (Level 1). Bisitan, bertatik bertara ikusi ahal izan zuten ikasle-profil horrekin nola lan egiten duten, bai eta barne-antolaketako eta gidaritza eta jarraipena egiteko hainbat modu ere, ikasketetan jarraitzea eta arrakasta izatea indartzen dutenak. Ikusitako alderdi garrantzitsuenetako bat Herbehereek Lanbide Heziketaren alde egindako apustu sendoa izan zen; izan ere, Lanbide Heziketan matrikulatutako ikasleen kopurua nabarmen handiagoa da Euskadin baino, eta urtez urte hazten jarraitzen du. Joera horrek hainbat sektoretan espezializatutako profesionalen beharrari erantzuten dio. Irakasleek nabarmendu zuten erakundeek laguntza handia ematen diotela ikasketa horiei herrialde horretan, eta hori agerikoa dela ikastetxeetako barne-langileen artean eta ikasleen orientazioan eta laguntzan aktiboki laguntzen duten kanpo-eragileen artean. Bisitan atzemandako hobekuntzak HETEL osatzen duten gainerako ikastetxeekin partekatuko dira, Oinarrizko Lanbide Heziketa Euskadin indartzen jarraitzeko helburuarekin.
Oteitza Lizeoa, berriro irabazle “Machining Meets Talent” lehiaketaren hirugarren edizioan
Aurten, erronka solidario batek gidatu du Fabrikazio Mekanikoko Diseinuko ikasleen lana Oteitza Lizeo Politeknikoa izan da irabazle III. “Machining Meets Talent” by CERATIZIT lehiaketan, bigarren urtez jarraian. Lehiaketa honetan beste 8 HETEL ikastetxetako Fabrikazio mekanikoko ikasleek parte hartu dute eta maila handia erakutsi dute: Politeknika Txorierri, Maristak Durango, Goierri Eskola, Zulaibar, La Salle Berrozpe, Lea Artibai, UGLE eta Peñascal Koop. Antolaketatik ikastetxe hauen tutore eta irakasleen lana eskertu dute, beraien eguneroko lanak gazte hauen talentua inspiratzen, gidatzen eta indartzen baitu. Aurtengo erronka berezia izan da: APDEMAk kudeatutako Foru Arretako Zerbitzuaren baitan dauden 0 eta 6 urte bitarteko eta mugikortasun arazoak dituzten haurrei zuzendutako bipedestagailu baten pieza garrantzitsu bat diseinatu eta fabrikatzea. Oteitzako taldea nabarmentzeko moduko lana egin du, eta sari gisa CERATIZITen Boadillako (Madril) zentro teknikoan prestakuntza jasoko du. Lea Artibai eta Maristak Durango bigarren sailkatu ziren, eta 500 euroko CERATIZIT tresna-bonoa eskuratu dute. Ekimenak erakusten du elkarlanaren bidez —enpresak, ikastetxeak eta gizarte-eragileak— benetako aldaketa soziala bultza daitekeela. Abantean!
Salesianos Urnietako irakasleek HETELen eskutik Bulgariako enpresen eta ikasleen bisita egin dute
Lau ikasle dira, eta ERASMUS+ programan parte hartzen ari dira Sofian, Bulgariako hiriburuan. HETELen eskutik egin dute, Euskal Autonomia Erkidegoko itunpeko LHko ikastetxeek osatzen duten elkartearen eskutik. Salesianos Urnietako bi irakasle Sofiara joan dira, Bulgariako hiriburura, han ERASMUS+ bekarekin dauden ikasleak bisitatzera. Ikasleen egonaldi hau Dual Orokorraren baitan sartzen da; hau da, ikasten ari diren Lanbide Heziketako zikloa amaitzeko enpresan hiru hilabetetako egonaldia egin behar dute eta kasu honetan, bulgariako enpresetan ari dira egiten. Egonaldian, gainera, ikasleak prestatzen ari diren enpresetako batzuk bisitatu ahal izan dituzte, baita hango Lanbide Heziketaren testuingurua ezagutu eta kolaborazio posibleak aztertu ere. Bisitatutako enpresetako bat BHTC da, munduko liderretako bat automobilgintza industriako kontrol klimatikoaren eta kudeaketa termikoaren arloan. Produktu multzo nagusiak ibilgailuen aire giroturako kontrol panelak eta kontrol unitateak dira, baita kontsola zentralak/HMIak ere. BHTCk prozesu osoa hartzen du, produktuaren diseinutik hasi eta klimatizazio sistema osoen ekoizpeneraino. Era berean, Bulgariako hiriburutik igaro dira enpresa laguntzaileekin zein agentzia bitartekariekin loturak sendotzeko eta, horrela, etorkizuneko kooperazioetan lanean jarraitu ahal izateko. Bertako errealitatea ezagutzeko aukera izan dute bi irakasleek eta etorkizunean ildo horretatik lanean jarraitzeko zubiak eraiki dituzte.
Zulaibarreko irakasleak, Herbehereetan egindako Erasmus+ mugikortasunarekin euren praktika pedagogikoa aberastu dute
Zulaibarreko irakasle diren Irene eta Evak HETELen Erasmus Plus bekari esker Herbehereetara mugikortasuna egin dute. Erasmus esperientzia hau oso aberasgarria izan da, izan ere, estimulazio multisentsoriala Snoezelen bidez lantzen duten baliabideak ezagutu ahal izan dituzte. Bisita honetan material eta gela multisentsorialak ezagutu dituzte, bai eta gela horiek erabiltzen dituzten profesionalak ere; haien eguneroko jarduna behatu eta erabiltzaileekin elkarreraginean aritzeko aukera izan dute. Horrez gain, Snoezelenetik harago, aniztasun funtzionala duten pertsonekin esku hartzeko hainbat testuinguru (jolasgunea eta hezkuntza) ezagutu dituzte. Esperientzia honi esker, ideia ugari ekarri dituzte Zulaibarreko gela multisentsoriala eta aniztasun funtzionala duten erabiltzaileekin esku hartzeko moduak hobetzeko. Horrez gain, etorkizunean elkarlanean aritzeko aukera egon daitekeen kontaktuak ere lortu dituzte. Bestalde, oso interesgarria izan da guretzat ezezaguna zen herrialde eta kultura bat ezagutzea, oso ongi hartuak sentitu gara eta ingelesa praktikatzeko eta soltura hartzeko aukera ere izan dugu.
Moodle Moot Euskadik 100 profesional inguru bildu ditu AA Hezkuntzan erronkari buruz hausnartzeko
Joan den astean Moodle Moot Euskadi 2025 ospatu zen Euskaltelen Derioko egoitzan, HETELek antolatuta, Mondragon Unibertsitatearen laguntzarekin, UPV/EHUren parte-hartzearekin eta Euskaltel Fundazioaren babesarekin.Lanbide Heziketako eta unibertsitateko 100 irakasle inguruk, Moodle komunitateko IKT adituekin batera, hitzaldi eta tailer ugari eskaini dituzte “Moodle eta adimen artifiziala hezkuntzan” lelopean. MoodleHQ, AIEDUtech & Teach For All, UPV/EHU, IsardVDI eta Mondragon Unibertsitateko erreferentziazko hizlariek AAk hezkuntzan, Moodle inguruneari lotuta, duen orainari eta etorkizunari buruzko tresnak, esperientziak eta gogoetak partekatu dituzte. Bereziki eskerrak eman nahi dizkiogu HETEL ikastetxeetako IKT arduradunek eta Mondragon Unibertsitateko adituek osatutako batzorde antolatzaileari, bai eta Euskaltel Fundazioaren laguntzari ere, topaketa hau posible egiteagatik. Lekukoa, orain, TKNIKAri pasatuko zaio, 2026an Moodle Moot Euskadi antolatuko duen erakundea. Eskerrik asko hurbildu zareten guztioi eta, bereziki, zuen ezagutza komunitatearekin partekatu duzuenoi. Mila esker!
Peñascalek ekintzailetza sustatzeko metodologia berriak aztertu ditu Polonian
HETELen Erasmus+ beka bati esker, eta TKNIKAk urrats bateko arduradunentzat antolatutako Poloniara egindako bisitan, Peñascaleko Ines IbañezEk, parte hartu ahal izan du hezkuntza-jardunbide egokien trukea ardatz duen topaketa honetan. Astebetean, ikasleen artean espiritu ekintzailea sustatzera bideratutako metodologia berritzaileak aztertu ziren. Mugikortasunaren helburu nagusia Europako beste hezkuntza-sistema batzuetan sormena eta ekimena nola sustatzen den zuzenean ezagutzea izan zen. Beste herrialde batzuetan egiten dena ezagutzea funtsezkoa da gure hezkuntza-estrategiak aberasteko horregatik, TKNIKAk topaketa horiek antolatzen ditu Europako beste herrialde batzuekin. Mugikortasun horren ondorioek Peñascalen ekintzailetza-proiektuak bultzatzen jarraitzeko balioko dute, etorkizuneko erronkei ekimenez eta sormenez aurre egiteko pertsona prestatuak prestatzeko helburuarekin bat etorriz. Abantean!
LKSk Lanbide Heziketaren aldeko apustua egin du talentua erakartzeko
HETELek LKS enpresarekin duen lankidetza indartu du, HETELen informatikako prestakuntza-zikloetako ikasleen gaitasun teknikoak eta zeharkakoak hobetzeko. Aste honetan inauguratu da Zabalburu ikastetxean lehen enpresa-gelaren hirugarren edizioa, unibertsitateetan ezarritako eredua Lanbide Heziketari egokituz. Ekimen hau informatikako prestakuntza-zikloetako ikasleei zuzenduta dago bereziki, sektore digitalaren erronkei eraginkortasunez heltzeko helburuarekin. LKS enpresak ikasturte-amaierara arte, , enpresa horretako profesionalen tutoretzarekin, LKS proiektuetan arituko diren lehen mailako Lea Artibai eta Zabalburu ikastetxeko 8 ikasle hautatu ditu. Datorren ikasturtetik aurrera, hautatutako pertsona hauek HETELeko ikastetxeetako eskoletan eta LKS enpresan egonaldia konbinatuko dute, Dual ereduari jarraituz. Gure asmoa da eredu hau sektore eta enpresa gehiagotara hedatzea etorkizunean. Abantean!