Oteitza Lizeo Politeknikoko sei ikasle ausart, bi irakasle konprometiturekin batera, ilusioz betetako truke-proiektu batean murgildu ziren Herbehereetako Dordrecht hirian dagoen ROC Da Vinci ikastetxearekin. Abentura hau proiektuaren bigarren fasea izan da; izan ere, aurrez sei ikasle herbeheretarrek Oteitza Lizeo Politeknikoaren instalazioak bisitatu zituzten, eta horrela eman zioten hasiera ekimenari. Lehen etapa horretan, ezagutzak eta iritziak partekatu zituzten, eta talde-lanaren hainbat alderdi bizitzeko aukera izan zuten. Bidaia hau izan da proiektuaren amaiera. Bertan, ROC DA VINCI ikastetxeko instalazio ikusgarriak ezagutzeko aukera izan zuten, proposatutako erronkari amaiera emateko. Esperientzia borobiltzeko, eskualdeko enpresa erreferenteetako batek, GBS International enpresak, ateak zabaldu zizkien. Quintinek (GBSko hezkuntza-arloko arduraduna) eta Josek (gehikuntzazko konponketaren arduraduna) gidatutako bisitan, eskaintzen dituzten zerbitzu guztiak zehaztasunez azaldu zizkieten, baita praktiketako ikasleek lantegian jasotzen duten prestakuntza eta ondorengo jarraipena ere. Jasotako harrera ezin hobea izan zen. Esperientzia hau guztia Rotterdam hiriak eskaintzen duen ingurune paregabeak lagundu zuen. Hiriak dituen kontrasteak eta aisialdirako aukerak gozatzeko aukera izan zuten. Benetako abentura, zalantzarik gabe. Eskerrik beroenak HETELi eta Erasmus+ bekari, esperientzia eder hau bizitzeko aukera emateagatik.
Kategoria: Albisteak
STEAM Forward Erasmus Proiektuaren hasiera-bilera Lisboan
STEAM Forward: Empowering Educators to Inspire Future Careers Erasmus+ proiektuaren hasiera-bilera Lisboan egin da urtarrilaren 29an eta 30ean, bazkide-erakunde guztiak bilduz proiektuari hasiera ofiziala emateko. Erasmus Programaren baitan finantzatuta, proiektuaren helburua STEAM hezkuntza eta orientazio profesionala indartzea da, irakasleei metodologia berritzaileak, tresna digitalak eta praktika inklusiboak eskainiz. Lisboan IMPACTscik antolatuta, bilerak aukera bikaina eman zien bazkideei proiektuaren helburuak, lan-paketeak eta egutegiak lerrokatzeko. Agendan honako gaiak landu ziren: proiektuaren kudeaketa, prestakuntza-ikastaroaren garapena, MOOC plataformaren sorrera, gaitasunak indartzeko jarduerak eta zabalkunde-estrategiak, eginkizunen eta hurrengo urratsen ulermen partekatua bermatzeko. Lankidetza-sare honek esperientzia handiko erakunde anitz biltzen ditu: proiektuaren koordinatzailea den Fondacia Prosveta-Sofia, Business Foundation for Education, Computer Technology Institute and Press Diophantus, HETEL eta IMPACTsci. Nazioarteko lankidetza honek oinarri sendoa ezartzen du kalitate handiko emaitzak garatzeko eta Europako STEAM hezkuntzan eragin iraunkorra lortzeko.
HETELeko Lanbide Heziketan ikasten duten emakumeen enplegu-tasarik handiena industria-zikloetan dago
Euskadiko Lanbide Heziketak genero-segregazio nabarmena erakusten jarraitzen du, bereziki familia industrial eta teknologikoetan; izan ere, horiek dira, enplegagarritasun handiena dutenak. HETELek egindako azken txostenaren arabera, emakumeek LHko ikasle guztien %35 osatzen duten arren, industria- eta teknologia-zikloetan duten presentzia %10era ere ez da iristen. Aitzitik, gehienbat zerbitzuekin lotutako arloak ikasten dituzte, hala nola osasungintza, gizarte- eta kultura-zerbitzuak edo administrazioa eta kudeaketa. Azterketak egiaztatzen du segregazio hori denboran egonkor mantentzen dela eta, gainera, zenbait arlo teknologikotan areagotu egiten dela, informatikaren kasuan bezala, non emakumeen presentziak beheranzko joeran jarraitzen duen. Julen Elgetak, HETELeko presidenteak, adierazi bezala, bilakaera horrek agerian uzten du egungo neurriak ez direla nahikoak STEM esparruetako genero-arrakala murrizteko, eta horrek etorkizuneko lan-aukerei eragiten dien segregazio estrukturala indartzen du. Testuinguru hori gorabehera, HETELeko ikastetxeetan LH titulua lortu duten emakumeen laneratze-datuak oso positiboak dira. Enplegagarritasuna nabarmen handitzen da kualifikazio-maila igotzen den heinean, eta bereziki datu azpimarragarriak lortzen dira Dual Intentsiboko modalitatean; izan ere, ziklo askotan —goi-mailakoetan zein erdi-mailakoetan— %100eko laneratzea erregistratzen da. Modalitate hori, beraz, emakumeen enplegurako sarbidea errazteko tresna gisa sendotzen ari da, batez ere industria- eta teknologia-inguruneetan. Txostenak, halaber, ikasitako prestakuntzaren eta egindako lanaren arteko egokitzapen maila handia nabarmentzen du, bai eta emakumeek baloratzen dituzten faktoreen garrantzia ere: kontziliazioa, egonkortasuna, lanbide-promozioa eta errespetuzko lan-ingurunea. Emaitza horiek indartu egiten dute orientazio, sentsibilizazio eta laguntza estrategiak bultzatzen jarraitzeko beharra, Lanbide Heziketa eta lan-merkatua bidezkoagoak izan daitezen. ???? Txosten osoa hemen ikus daiteke: https://web.somoscaidalibre.com/wp-content/uploads/2026/01/INFORME-SITUACION-LABORAL-2024-2025-MUJERES.pdf
Ikaskuntza inklusiboa: Job Shadowing mugikortasuna Portugalen
Centro Formativo Otxarkoagako Cintia Tomaszek irakasleak, Portugalen Job Shadowing modalitateko mugikortasuna egin du, HETEL erakundeak kudeatzen dituen Erasmus+ programaren beka bati esker. Harrera-erakundea Escola Profissional de Aveiro izan da. Mugikortasun honen helburu nagusia ikaskuntza-bisita bat egitea izan da, behaketa bidez, ikastetxeak hezkuntza-premia bereziak dituzten ikasleak nola kudeatzen dituen ezagutzeko, baita lehen eskutik bere jardunbide inklusibo onak ezagutzeko ere. Egonaldian zehar, elkarrekin lan egin da ikasle-talde horri nazioarteko aukerak eskaintzeko estrategiak diseinatzeko, gure ikastetxearen oinarrizko balioekin erabat lerrokatuta. Era berean, ikastetxeko orientatzaileekin biltzeko aukera izan dugu, eta etorkizuneko lankidetza baterako ibilbide-orria zehaztu dugu; espero dugu harreman sendo eta iraunkor baten hasiera izatea. Proiektu hau martxan jartzeko aukerarekin oso ilusionatuta gaude, eta eskerrak eman nahi dizkiegu hori posible egiten ari diren pertsona guztiei.
HETELek eta Kataluniako ACFPI elkarteak Esther Monterrubiorekin bilera egin dute
Esther Monterrubio Madrilgo Gobernuko LHko idazkari nagusiak HETELeko (Euskadiko gizarte-ekimeneko itunpeko LHko ikastetxeen elkartea) eta ACFPIko (Kataluniako LHko itunpeko ikastetxe integratuen elkartea) ordezkariak hartu ditu. Bileran, Lanbide Heziketako Lege berria ezartzearekin lotutako hainbat alderdi jorratu dira. Bilera hau bi elkarteak Jon Labaka Eusko Jaurlaritzako LHko sailburuordearekin eta Francesc Roca Generalitateko LHko idazkariarekin bildu ondoren egin da. HETEL eta ACFPI elkarteetako arduradunek bilera aprobetxatu zuten ikasturteko ekintza-plana zehazteko eta bi erakundeen arteko lankidetzan aurrera egiteko.HETELek hezkuntza-kalitatea eta, bereziki, Lanbide Heziketa hobetzeko konpromisoa berresten du, sektoreko funtsezko eragileekin lankidetzan arituz.
LH FPONLH Arabako enplegagarritasun jardunaldien edizio berria
Azaroko azken astean Arabako LHko enplegagarritasun jardunaldien edizio berri bat egin da. “LH ON LH” lelopean, Arabako LHko Enplegagarritasun Jardunaldien helburua Arabako Lanbide Heziketako ikasleen laneratzea edo enplegagarritasuna hobetzeko ikaskuntza- eta truke-gune izatea da, lan-merkatuaren beharretara hurbilduz. Ekimena Arabako Foru Aldundiko Enplegu, Merkataritza, Turismo eta Foru Administrazio Sailetik abiatzen da, eta Lanbideren, Euskal Enplegu Zerbitzu Publikoaren, eta Euskadiko Lanbide Heziketako ikastetxe sareen (Ikaslan Araba eta HETEL) babesa du. Edizio honetan, Arabako Lanbide Heziketako hainbat ikastetxek ikasleentzat tailer ezberdinak antolatu dituzte, hauen enplegagarritasuna hobetzeko helburuarekin: – Lana bilatzeko CIP prozesua (Jorge Ortiz de Urtarán) – Zure marka pertsonalak dena esaten du. RRSS, Internet eta enplegua (Miguel de Ándres)– Norberaren ezagutza eta motibazioa enpleguan (Leyre Cano) – Lan egiteko modua: aktibatuta (AMPEA) – Lansarean: euskarazko lan-ataria (Uxue Andoño) – Ezagutu enplegurako zure kolore-talentuak (Javier Yoller) Esparru horretan, azaroaren 26an Lanbide Heziketako tituludunentzako Enplegu Azoka antolatu da Europa Jauregian. Lanbide Heziketako profilak dituzten pertsonak sartzeko beharra duten enpresen eta Lanbide Heziketako tituludunen arteko topagunea da. Gainera, erakunde publikoak eta lan-munduarekin lotutako eragileak ere egon dira. 30 enpresa parte-hartzaile baino gehiagok 300 elkarrizketa baino gehiago egin dizkiete eskainitako lanpostuetan interesa duten pertsonei. Zehazki, hauek izan dira parte hartu duten enpresak: ACITURRI-ALESTIS, AEG POWER SOLUTION IBERICA, AJL OPHTALMICS, ALAVESA DE MECANICA Y TRANSFORMACIONES (LOGIBERIA), ALDAKIN VITORIA, A Y G ASISTENCIAL, BASQUEVOLT, CABALLITO-PFERD, COYCAVI, CYBERTIX, DHL SUPPLY CHAIN, EBA, EGOIN WOOD GROUP, ETHYPHARM, FERROVIAL ENERGY, FIASA, IMESAZA, INGURU ABENTURA, MATECO, MYCESA, ORONA, PEPSICO, RESIDENCIA UZQUIANO, RPK, SECURE.IT, SERBILAU, SERVEO, TALGO, TRANSGRUAS, ULMA eta ZAINTZEN.
Network of Networks urteroko topaketa Derryn
Azaro bakoitzean, Network of Networks-eko kideak sarea osatzen duten herrialdeetako batean biltzen dira nazioarteko lankidetza ospatzeko eta bultzatzeko. 2025ean, Ipar Irlandak harrera eskaini zigun Derryn. Bertan, The Dutch Alliance, Finn-Net, HETEL, City of Dublin ETB, Colleges of Scotland eta Northern Ireland Colleges ikastetxeetako ikastetxeek aukera izan zuten Europako lanbide-heziketarako garrantzitsuak diren gaiei buruzko lantaldeetan biltzeko. Berrikuntza, mugikortasuna, gaitasun profesionalen inguruko lehiaketak, jasangarritasuna eta ekintzailetza eztabaidarako eta etengabeko lankidetzarako gai nagusiak izan ziren. HETELeko ikastetxeak (Egibide, Nazaret, Maristak Durango, Jesuitak Politeknikoa eta Goierri Eskola) lantaldeetako kide dira, eta nazioarteko lankidetzarako aukerekin bueltatu ziren beraien ikastetxeetara, lanbide-heziketako hainbat arloetako ikasleak eta langileak inplikatzeko, LHko komunitatean nazioarteko gaitasunak garatzen jarraitzeko. Datorren urtean, Network of Networks Euskal Herrira etorriko da, HETEL anfitrioi duela. Ahalegin guztiak egingo ditugu aurreko edizioetako maila altuari eusteko. NoN familia hemen hartzeko irrikitan gaude!
HETELek ZTIM orientazio-jardunaldi bat antolatu du Somorrostro ikastetxean
Somorrostro ikastetxeak STEAM Orientazio Jardunaldi berri bat hartu du, Innobasquek eta Elhuyar Fundazioak antolatua, Eusko Jaurlaritzak bultzatutako STEAM Euskadi Estrategiaren barruan. Jardunaldi honetan San José de Calasanz (Santurtzi) eta Salesianos Barakaldo ikastetxeetako DBHko 4. mailako 50 ikaslek parte hartu dute, zientzia eta teknologiari lotutako lanbideen aniztasuna zuzenean ezagutzeko aukera izan dutenak. Jardunaldi hauen helburua ikasleak lanbide zientifiko eta teknologikoetara (ZTIM) hurbiltzea da, euskal industria-, zientzia- eta teknologia-sektoreko profesionalekin zuzeneko harremanaren bidez haien prestakuntza- eta lanbide-aukeraketan lagunduz. “Hitzordu azkarrak” ZTIM profesionalekin Speed dating ekitaldi ezagunetan oinarrituta, saioak “hitzordu azkarren” formatuan egin dira ikasleen eta profesionalen artean. Hamabost minutuko blokeetan, bost ikasleko talde bakoitzak profesional desberdinekin hitz egin du beraien ibilbide akademikoaz, egungo lanaz, aurre egin beharreko erronkez eta sektorearen aukerez.Formatu arin eta hurbilak aukera eman die ikasleei kezkak trukatzeko, zalantzak argitzeko eta hainbat irteera profesional gertutik ezagutzeko. LH barrutik ezagutzen Profesionalekin izandako elkarrizketen ondoren, ikasleek Somorrostro ikastetxeko irakasleek eta ikasleek antolatutako tailer praktiko batzuetan parte hartu dute, eta horietan Lanbide Heziketako hainbat arlo esperimentatu ahal izan dituzte:• 3D diseinuko eta inprimaketako tailerra • Fabrikazio mekanikoko tailerra • Soinu-tailerra • Informatikako tailerra (Oinarrizko LHko ikasleek gidatua) • Automobilgintzako tailerra Esperientzia aberasgarria izan da, eta Lanbide Heziketaren mundua, aplikazio praktikoekin eta etorkizunerako eskaintzen dituen aukera ugarien bizipenez ezagutzeko aukera izan dute. Bokazio zientifikoak sustatzen Jardunaldi horiek STEAM Sare sarearen jardueren parte dira. Sare horrek ikastetxeak, unibertsitateak, zentro teknologikoak eta enpresak biltzen ditu, euskal gazteen artean bokazio zientifiko-teknologikoak sustatzeko. Horrelako ekimenen bidez, hezkuntza-munduaren eta produkzio-munduaren arteko elkar ezagutza sustatzen da, eta gazteei beren etorkizun profesionala zientziaren, teknologiaren eta berrikuntzaren arloetan irudikatzeko inspirazioa ematen zaie.
Eskerrik asko HETEL Sarian gurekin egon zareten guztioi
Azaroaren 3an, HETELek “HETEL Saria” sariaren IX. edizioa ospatu zuen, Lanbide Heziketarekiko konpromisoaren saria, aurten “Elkarlana eraldaketarako gakoa” lelopean. Ekitaldi honetan, gizarte-eraldaketa lortzeko lankidetzak duen garrantzia nabarmendu nahi da, Sebastien Lópezen eskultura, HETELen lidergoa eta lankidetza irudikatzen dituena, sariaren golardoarekin bat etorriz. Ekitaldiari hasiera emateko, Julen Elgeta HETELeko presidenteak elkartearen estrategia berria aurkeztu zuen eta lankidetzaren garrantzia azpimarratu, Lanbide Heziketa eta gzartea eraldatzeko. Ondoren, erakunde laguntzaileei, Euskaltel Fundazioari eta BBK Fundazioari, bidea eman zitzaien. Honen ostean, “Gizarteratzeko aliatuak: Lanbide Heziketatik bizitzak eraldatzen dituzten lankidetzak” mahai-ingurua egin da. Bertan izan dira Koldo Usubiaga, Peñascal Heziketa ikastetxeko enpresekiko harremanetarako arduraduna; Javier Urzay, Decocarpi, baztertzeko arriskuan dauden profilak dituen enpresa kolaboratzailea; eta Némesis Eduarda Perlaza, diseinu eta altzari-hornikuntzako tituluduna, oinarrizko mailako LHn hasi zuen ibilbidea kontatuko diguna. Julen Elgetak, Gorka Aretxaga, Xabi López eta Javier Laisekarekin batera, HETEL Saria 2025 sariak eman zizkien GRI Forjas Iraeta, Ingeteam eta RPK enprei, Lanbide Heziketarekin duten lankidetza nabarmenagatik. Sarituak izan dira, hain zuzen ere, bigarren mahai-inguruko protagonistak. Mahai-inguru horretan, “Lankidetza eraldatzeko gako gisa: Enpresak eta LH etorkizuna eraikitzen” gaia jorratu da, eta Lanbide Heziketako enpresek eta ikastetxeek gizarte gisa aurrera egiteko duten elkarlanaren beharrean sakondu da. Ekitaldia Begoña Pedrosa Hezkuntza sailburuaren hitzaldiarekin amaitu da, Euskadiko Lanbide Heziketak dituen onurak azpimarratu zituelarik. Pilar Kaltzada jardunaldiaren dinamizatzailea izan zen. Ekitaldian ordezkaritza instituzional eta sozial handia izan zen, eta HETELetik eskerrak eman nahi dizkiogu, Euskadiko Lanbide Heziketaren garapenerako hain beharrezkoak diren lankidetza eta ahaleginen lerrokatzea sendotzen dituelako. Amaitzeko, eskerrak eman nahi dizkiegu Euskaltel eta BBK Fundazioeei aurten ere Lanbide Heziketarekiko konpromisoaren Sari hau babesteagatik. Eskerrik asko eta Abantean! Laburpen bideoa: https://youtu.be/wiYHjAQMe9E
Gaitasun digitalak eta jasangarritasunekoak hobetzeko materialak garatuz
Urriaren 8an eta 9an Urbinon (Italia) izan ginen DIGISTAINABILITY proiektuaren nazioarteko bileran. HETELek koordinatzen duen Erasmus+ proiektu honek, goi-mailako Lanbide Heziketako eta unibertsitateko marketin-titulazioetan gaitasun digitalak eta iraunkortasunekoak sustatzea du helburutzat. Alemania, Bulgaria, Euskadi, Italia eta Portugalgo zazpi entitatek parte hartu dute partzuergoan (Università di Urbino Carlo Bo, Instituto Politécnico de Tomar, Nazaret Fundazioa, ilmiolavoro eta ACEEU, baita HETEL ere). Bileran bazkide diren erakundeetako marketineko ikasleek parte hartu zuten, programaren xehetasunak ezagutzeko eta etorkizuneko pilotajea prestatzeko. Topaketan, garatutako material didaktikoak berrikusi ditugu, eta hurrengo faserako jarduerak definitu ditugu: ikasleekin pilotatzea. Horren ondoren, ikastaroak eta marketinerako gaitasun digital eta berdeetako mikrokredentzialen sistema doitu ahal izango ditugu. Informazio gehiago: https://digistainability.eu/es/home-4/