Julen Elgeta HETELeko presidenteak eta Oihane Aldayturriaga BBK-ko talentu eta ekintzailetzako arduradunak “2021-2022 HETEL ikastetxeetako heziketa zikloetako laneratze” txostena aurkeztu dute, Lanbide Heziketako 2 ikaslerekin batera. Azterketa hori telefono bidezko 3.000 inkesten bidez egin da HETELeko 28 ikastetxetako ikasleen artean, ikasketak 2022ko ekainean amaitu dituztenak eta 19 lanbide-arlotakoak direnak. Goi-mailako lanbide-heziketan titulua jaso duten pertsonen %80k 6 hilabetean aurkitzen du lana. Enplegagarritasunaren ehuneko orokorra iaz baino 3 puntu handiagoa da, eta duela 2 urte baino ia 10 puntu handiagoa. Txostenean zehazten dira, gainera, kualifikazio-mailaren araberako laneratzea, ikasten jarraitzen duten pertsonen ehunekoa, heziketa-zikloaren edo lanbide-arloaren araberako laneratze-datuak, Lanbide Heziketa Dualaren garrantzia, STEM heziketa ziklo bat egiten duten nesken datu nabarmena eta beste datu interesgarri batzuk. Aipatzekoa da, halaber, zenbat eta kualifikazio handiagoa izan, orduan eta laneratze-tasa handiagoa dela eta pertsonen ia %83k egindako ikasketekin bat datorren enplegua duela; iaz, berriz, %77koa izan zen. Ikerketa horren zabalkundean BBK-k parte hartu du, eta iparrorratza da, ez bakarrik EAEko Lanbide Heziketarentzat edo HETELentzat, baita ikastetxe bakoitzarentzat ere, etorkizunerako estrategia hedatzeko orduan. Txosten osoa esteka honetan eskuratu dezakezu

Aste honetan Erasmus+ VR4VET proiektua abiarazteko bilera izan dugu Jyväskylä-n, Finlandian. HETELen nazioarteko lantaldeak eta Egibide eta Sopeña Bilbaoko irakasleek bat egin zuten ROC van Amsterdam (NL), Provrex (NL) eta Aarhus Tech (DK) erakundeetako gainerako kideekin, Gradia (FI) erakunde anfitrioiak koordinatuta, 3 egunez ingurune birtual bat garatzen hasteko. Ingurune birtual horretan, 4 eremu egongo dira, eta bakoitzak 3 agertoki izango ditu, Lanbide Hesiketako hainbat adarretan (ostalaritza, aholkularitza, ile-apainketa eta estetika eta retail) bezeroari arreta emateko trebetasunak entrenatzeko. Gure bazkide industrialek ere, tartean SAYMA euskal erakundeak, bat egin zuten birtualki topaketaren zati batean. Etxera etxeko lan askorekin itzultzen gara, baina, batez ere, ilusioz eta pozik, hain hasiera ona eta elkarlana direla eta. Irailean gure bazkideekin Amsterdamen berriro biltzeko irrikan gaude, eta bitartean online!

Joan den astean, Build@Home proiektuko taldea ROC Da Vinci Holandako Lanbide Heziketa ikastetxean bildu zen, martxoaren amaieran Bolonian (Italian) egingo den prestakuntza-jarduera prestatzeko. Jarduera hori lanbide heziketako ikastetxeetako nazioarteko koordinatzaileentzat izango da, eta Lanbide Heziketako ikastetxetan nazioartekotzea etxetik sustatzera bideratuta egongo da, nazioartekotzearen “enbaxadoreak” sortzeko ikuspegi bereziarekin. Gai horren ondoren, Build@Home ikaskuntza birtualaren inguruneari eskainitako lan-saio bat ere izan genuen. Bertan, ROC Nijmegen ikastetxeko ikasleek (Herbehereetako ikastetxea eta Erasmus+ KA2 proiektuaren koordinatzailea) hainbat aukera aurkeztu zituzten proiektuan garatutako materialak eskegiteko (nazioartekotzearen iparrorratza, nazioartekotzeari buruzko hausnarketa estrategikoa sustatzeko gutunak eta baliabideen biltegi digitala), Lanbide Heziketako ikastetxetan nazioartekotzea etxetik ezartzeko prozesuari jarraituz, ZERGATIK lanbide heziketaren nazioartekotzea gogoetatik abiatuta, ondoren ZER eta NOLA egin zehaztu.

Joan den astean, Maristak Durangok eta HETELek harrera egin zieten DualECO proiektuko bazkideei, Lanbide Heziketako ikastetxeen eta proiektuan ordezkatutako eskualde bakoitzeko (Bremen, Ipar Irlanda, Lonbardia eta Euskal Herria) ekosistema sozioekonomikoko beste erakunde batzuen arteko lankidetza-jardunbide egokiak pilotatzeko planei buruzko ideiak partekatzeko nazioarteko bilera batean. HETELek eta Maristak Durangok LHko irakasleen eta IKT sektoreko enpresen arteko topaketa batekin hasi dute pilotajea, IKTekin eta, bereziki, zibersegurtasunarekin lotutako LHko ikasketa-plana hobetzeko egin daitezkeen ekintzak ezagutzeko. Topaketa hauen emaitzak proiektuaren webgunean argitaratuko ditugu! http://dualeco.eu/

Abenduaren 12an eta 13an, HETEL Heziketa Teknikoko Elkarteak Erasmus DIGISCHOOL (AMSP-Asociace Mal, A Stredních Proniku a Zivnostníku (CR), Institut INPRO (CR), RegioVision (DE), Ilmiolavoro (IT) eta HETEL, UGLE eskolarekin batera) proiektuko bazkideen bilera hartu zuen Durangon. DIGISCHOOL proiektuaren helburua Lanbide Heziketako irakasleei zuzendutako hezkuntza-plataforma bat garatzea da. Plataforma horren bidez, irakasleek, eduki berrien bidez, tresna digitalen ezagutza eta erabilera areagotu ahal izango dute beren hezkuntza-jarduera osoan. Bileran zehar, identifikatutako jardunbide onenak (DIGI Cases) eta irakasleek erabiltzeko tresna egokiak (DIGI Toolbox) amaitu ziren, bai eta plataformak eta mikro prestakuntza-unitateen edukiek izan beharko lituzketen ezaugarriak zehaztu ere (DIGI Hub). Datozen hilabeteetan aurrera egingo da mikro prestakuntza-unitate horien sorreran, bai eta irakasleak hautatutako tresnei dagokienez gaitzen ere, Euskadin datorren urtarrilaren amaieran egingo den prestakuntza-jarduera batetik hasita.

Joan den astean HETELek Hebreerako Da Vinci College ikastetxeko informatikako 2 irakasle jaso zituen. Bisitaren parte gisa, Maristak Durango HETEL ikastetxera hurbildu ziren. Bertan, zibersegurtasuneko espezializazioko eta sareko informatika-sistemen administrazioko goi-mailako zikloko ikasleek, ingelesez, ikasgelan aurre egin beharreko erronkak aurkeztu zizkieten. Halaber, Urduliz42 bisitatu genuen, Telefonica Fundazioaren programazio campusa eta Bizkaiko Foru Aldundiak babestua, eta ideiak trukatu genituen industriako zibersegurtasunari buruzko proiektu batean parte hartzeko. HETEL-Da Vinci lankidetza aspalditik dator eta beti da plazer bat zuek jasotzea. Hurrengora arte! Abantean!

Urriaren 24tik 28ra bitartean, La Salle Berrozpe (Andoain) eta Zulaibar (Zeanuri) ikastetxeetako irakasleek Koloniako (Alemania) Hans-Böckler-Berufskolleg Lanbide Heziketako ikastetxea bisitatu zuten, HETELen Erasmus+ beka bati esker. Bisitaren helburua Alemaniako Lanbide Heziketa ezagutzea, ikastetxeko instalazioak bisitatzea eta ikasleekin elkarreraginean aritzea izan da, hiru ikastetxeen artean nazioarteko eta diziplinarteko erronka abian jartzeko helburu nagusiarekin. Abantean! Astean zehar, Alemaniako enpresek LHko ikasleen ikaskuntza-prozesuan duten inplikazioa bertatik bertara ikusteko aukera eman digute. Adibide gisa, Atlas Copco enpresa eta ikasleek praktikak egiten dituzten instalazioak bisitatu dituzte.

Iñigo Urkullu lehendakariak eta Jokin Bildarratz Hezkuntza Sailburuak harrera egin diete Julen Elgeta HETELeko presidenteari eta elkarteko lurralde ordezkariei Xabier Lopez Arabakoari, Luciano Cearsolo Bizkaikoari eta Gorka Aretxaga Gipuzkoakoari, HETELek 35 urte bete baititu euskal Lanbide Heziketa bultzatzen. Euskadiko Lanbide Heziketa asko aldatu da 35 urte hauetan. Gaur egun, Europako punta-puntakoa da, beste herrialde batzuetarako eredua, bai enplegagarritasunagatik – pandemia garaian ere, ikasketak amaitu eta sei hilabetera %72 baino handiagoa izan zen–, bai Lantokiko Prestakuntza, Erasmus+ programa, prestakuntza duala edo ikasleek erdi-mailako edo goi-mailako zikloak amaitu bitartean egin ditzaketen espezializazio-programak eta -ikastaroengatik (600 eta 900 ordu bitartekoak). Euskadiko Lanbide Heziketako ikastetxeen zeregina ere asko aldatu da 35 urte hauetan, “eta eskualdeko garapenerako funtsezko eragile bihurtu da, enpresa-sarearekiko hurbiltasun handiagoa baitu orain, berrikuntza-proiektuetan, prestakuntza-planetan, enplegu-poltsetan,… lankidetzan dihardutelarik. Eskualde-garapen hori hasieratik izan zen HETELen erronka nagusietako bat, eta, beraz, oso pozgarria da esparru horretan aurrera egitea lortu dugula ikustea”, Julen Elgeta HETELeko presidenteak azaldu duenez. Halaber, aldaketa erradikala egon da ereduan, metodologian; izan ere, orain proiektuekin ikasten da, eta enpresa batzuk ere inplikatzen dira erronka horien garapenean. “Gainera, gure konpromiso soziala dela-eta, osagai soziala ere integratzen dugu erronka horietako askotan, hala nola GJHen aldeko apustuan, adibidez”, Elgetak azaldu duenez. HETELen beste funtsezko ezaugarri bat lankidetza da, elkarrekin aurrera egitea. “Horretarako, hainbat esparrutan sarean lan egiten dugu, lantaldeen bidez”, eta Lanbide Heziketa babesten duten pertsonei edo erakundeei aintzatespenak ematen dizkiegu bi urtez behingo sarien bidez. Baina elkarteak berak ere jaso ditu sariak, hala nola Confebasken saria, Bikain saria, Zilarrezko A saria, Lanbide Heziketan lortu zen lehena izan zelarik, eta abar. Zorionak HETEL! Abantean! https://www.irekia.euskadi.eus/eu/albums/20072-lehendakaria-hetel-euskadiko-lanbide-heziketako-ikastetxeen-elkartearen-arduradunekin-bildu    

Joan den astean, Aitor gure lankideak, UGLEko Iker Uzin irakaslearekin batera, Europako Erasmus plus DIGISCHOOL – Mastering Digital Teaching Tools in Vocational Educational and Training proiektuaren lehen prestakuntza-jardueran parte hartu zuten. Proiektu horren helburua Europako irakasleei beren gaitasun digitalak hobetzen laguntzea da, baita ikuspegi berriak praktikan jartzea eta irakaskuntza-jarduera digitalizatzen lagunduko dieten tresna berriak hartzen laguntzea ere. Urriaren 25etik 27ra bitartean Schwerinen (Alemania) egin zen prestakuntza-jardueran, bertaratutako irakasleek tresna digital espezifiko batzuk erabiltzen ikasi ahal izan zuten, bai eta esperientzia pertsonalak trukatu ere, egunerokoan tresna horiek erabiltzeari dagokionez. HETELek Animaker erabiltzeko klase bat eman zuen, eta bertaratuek oso harrera ona egin zioten. Hurrengo prestakuntza-jarduera Zumarragan izango da, UGLEren instalazioetan, urtarrilean, eta Alemaniako, Txekiar Errepublikako, Italiako eta Euskadiko irakasleek parte hartzea espero da.

Danimarka, Italia, Holanda, Finlandia eta Euskadiko irakasleek Build@Home proiektuaren esparruan antolatutako prestakuntzan parte hartu dute. Prestakuntza HETELek eta Zulaibar Arratiako Lanbide Ikastegiak antolatu dute, proiektuan garatutako materialak testatu, Lanbide Heziketako ikastetxeetan nazioartekotzeari buruzko hausnarketa eragiteko sortuak, eta etxetik mugitu gabe ezar daitezkeen nazioarteko jarduerak trukatzeko eta diseinatzeko. Hori guztia nazioarteko dimentsioa lanbide-heziketan integratzeko helburuarekin. Esperientziaren parte gisa, Jesuitak Indautxu ikastetxea ere bisitatu dute, nazioarteko lankidetza birtualean duten esperientzia ezagutzeko.