Kategoria: Albisteak

HETEL ikastetxeetako 4 nazioarteko arduradunek, Mentxu Sotok (UGLE), Rosa Nuñezek (Zabalburu), Isabel Mujikak (La Salle Berrozpe) eta Joseba Ramosek (Goierri Eskola), erasmus+ KA2 Europar proiektuen Diseinu eta eskarian prestakuntza jaso dute Atenasen. Prestakuntza IDEC aholkularitzak Piraeusen dituen instalazioetan izan da ekainak 19 eta 21a bitartean. Hiru egun hauetan asko ikasteko aukera izan dugu, izan ere, KA202 proiektu baten zirriborro bat idaztera iritsi gara. Natassa Kazantzidou eskertzea geratzen zaigu soilik, eskainitako denboragatik eta bere jakintza helarazteko duen gaitasunagatik. Prestakuntzaren balorazioa oso positiboa izan da. HETEL ere eskertu behar dugu, eta baita gure ikastetxeak ekintza honetan parte hartzea ahalbidetzeagatik. Efjaristó Mentxu, Rosa, Ixa eta Joseba

Eusko Jaurlaritzako Industria, Berrikuntza, Merkataritza eta Turismo Sailak, atzerrian praktikak egiteko “Global Training” izeneko beka-programa jarri du martxan. Programa horren bidez, EAEko gazteak atzerrira irtetea ahalbidetzen da. HETEL – Heziketa Teknikoko Elkarteak, Confebaskek, Txorierri politeknika ikastegia eta Adegik, 60 Global Training beka kudeatuko dituzte aurten, Goi mailako Lanbide Heziketako eta Unibertsitateko tituludunei zuzenduak. Beken iraupena 6 hilabetekoa izango da eta dotazio ekonomikoa 1.400€-koa izango da hilabetero. Aukeratutako bekadunak azaroan joango dira Alemania, Belgika, Brasil, Txile, ABE, Frantzia, Grezia, Herbehereak, Hungaria, India, Indonesia, Irlanda, Israel, Mexiko, Panama, Polonia, Erresuma Batua, Txekiar Errepublika, Errumania, Hego Amerika eta Sri Lanka…edo bestelako herrialdeetara Global Training beketan izena emateko epea uztailak 16ra arte irekita egongo da (goizeko 12:00ak arte!) … Eman orain zure izena! Informazio gehiago: http://www.global-go.net

Andoaingo La Salle Berrozpe ikastxeak HETEL elkartearekin batera beTEKu zabaltzen jardunaldia antolatu du. Jardunaldi honen helburu nagusiena Andoaingo La Salle Berrozpe ikastetxean lantzen ari den “Mikroelektronika: Proiektuen garapena eta mantenimendua” proiektuan lortutako emaitzen aurkezpena egitea izan da eta, ikastetxean etorkizunean jarraitu beharreko ildoei buruz hitz egin da. Jardunaldia, hiru atalez osatua izan da. Lehenengo zatian, Ceit-Ik4ko Joseba Etxeberriak Industria 4.0k ekarriko dizkigun erronkei buruz hitz egin digu. Jarraian, “Kolobot” robot kolaboratzailean lortutako emaitzak aurkeztu dira Andoaingo La Salle Berrozpeko Urko Alviraren eskutik, eta bukatzeko, Josema Fernandezek Andoaingo La Salle Berrozpe ikastetxean, “FPGA”ekin erabiltzen diren tresnak eta adibide bat aurkeztu du. 

Politeknika Txorierri HETEL abantean ikastetxeak “NET-ENT. Networking for Entrepreneurship” Erasmus+ proiektuan parte hartzen du. Proiektuaren helburua Lanbide Heziketako ikaslerian ekintzailetza sustatzea da ikuspegi ezberdinak erabiliz, hala nola, coaching tresnak, CANVAS eredua edo heziketa ziklo ezberdinen arteko hainbat jakintza alorretako proiektuak. Proiektu honen ekintzetako bat, Lanbide heziketako irakasleei zuzenduriko prestakuntza ekintza bat antolatu eta ematea da, Coaching tresna hauei buruzkoa, tresna hauek ikasleen garapen pertsonal eta profesionalean nola lagundu dezaketen azaltzeko. Haaga- Heila Finlandiako Unibertsitatean jasotako prestakuntzan, Txorierriko irakasleez gain, HETELen Erasmus+ mugikortasun bekei esker, HETELeko beste bi ikastetxetako irakasleak (Irungo La Salle eta UGLE) eta HETELen nazioarteko proiektuen arduradunak ere parte hartu dute. Prestakuntza honetan talde bakoitzak ikasitako Coaching tresnak bere erakundean nola ezarriko dituen aurkeztu behar izan du. Eskerrik asko Politeknika Txorierri aukera hau ematearren!

HETELeko ikastetxeek enpresentzat zerbitzu teknikoen hornitzaile izateko pausoak ematen jarraitzen dituzte. Lea Artibai Ikastetxearen modeloa ezagutzeko aukera izan genuen eta ziur gaude ideia bikainekin joango zirela beraien ikastetxeetara bertaratutakoek. Abantean!!!

Fabrikazio Mekanikoko Diseinua ikasi nuen Politeknika Ikastegia Txorierrin, eta Erasmus+ bekaren bidez praktikak atzerrian egiteko aukera izan nuen. Esperientzia bikaina iruditu zitzaidanez, Bilbora itzultzean Global Training beka eskatu nuen. Hautaketa prozesua gainditu ostean, Shapewaysera bidali ninduten. Shapeways 3D fabrikazioan diharduen enpresa da. Eindhovenen sortu zuten, baina egoitza nagusia New Yorken du eta fabrikak eta bulegoak ditu Eindhoven, Queens eta Seattle hirietan. Guztira 215 langile ditu, horietatik 94 Eindhovenen. Sormena sustatzen duen laneko sistema erabiltzen du, eta langileak gazteak eta kultura askotakoak dira. Enpresara iristean HP departamentuan kokatu ninduten. Berria da, eta HPren 3D Multi Jet Fusion teknologia erabiltzen dugu. Produkzio prozesuaren atal bakoitzean lan egiten irakatsi didate, eta makinen mantentze lanak aurrera eramaten. Gainera, astean egun batez, produkzio prozesuak hobetzeko berrikuntza proiektuetan lan egiten dut. Lan egiteko modu dinamikoa da enpresan gehien gustatzen zaidana, beti dago zer ikasi. Global Training bekari esker mundu osoko jendea ezagutu dut, beste kultura batzuk, bidaiatu egin dut… Horrelako esperientziarekin zabaldu egiten duzu munduaz duzun ikuspegia, norbere ikuspegia erabat aldatzen da, erronka profesional berriak dituzu eta, gainera, hori guztia ingelesez! Atzerrira bizitzera joatea esperientzia ahaztezina da, hasieran beldur apur bat ematen du baina segituan gainditzen duzu. Horregatik, erronka berriei heltzeko gogoa duten guztiei gomendatzen diet.

HETELek “Mikroerronkak 4.0” izeneko ekimena jarri du abian, Tecnalia, IK4-Tekniker eta IK4-Azterlan teknologia zentroekin batera eta BBKren Gizarte Ekintzak lagunduta. Ekimena bat dator HETELek euskal Lanbide Heziketa enpresen beharretara hurbiltzeko duen helburuarekin. Izan ere, helburu horrekin harreman estuak bilatzen ditu HETELek teknologia zentroekin, hain zuzen ere 4.0 industriako etorkizuneko profesionalak eta 4.0 pertsonak prestatzeko. Hala, HETELek eta teknologia zentroek 21 aditu teknologiko eta metodologiko trebatu dituzte aurrena, eta horiexek helarazi diete 100 irakasleei. Azken hauek 22 mikroerronka diseinatu dituzte 4.0 industriako 6 arlorik garrantzitsuenekin lotutakoak: gauzen interneta, lankidetzako robotika, big data, fabrikazio gehigarria, errealitate areagotua eta zibersegurtasuna. Erronkak arlo profesional ezberdinei lotuta daude: fabrikazio mekanikoa, merkataritza, informatika, osasungintza, elektrizitatea eta elektronika, mantenimendua eta administrazioa. Erronka hauek ikasleekin erabiliko dira datorren ikasturtean.

HETELen Erasmus+ beka batez baliatuz, Arratiako ZULAIBAR Lanbide Ikastegiko Xiber Perez Arroita irakaslea Belgikako zentro ezberdinetatik ibili da. VLOT! (Vrij Lokers Onderwijs voor jouw Toekomst) elkarteko Flandriako Lokeren herrian aurkitzen den VTI Sint-Laurentius zentroarekin harremanetan jarri ondoren, bertara hurreratu eta informazio aberasgarria eskuratu du, metodologia, klaseen banaketa, ebaluatzeko prozesuak, etab. Zentro horretaz aparte, inguruko beste eskola batzuetatik ere informazioa eskuratzeko aukera izan du Zulaibarreko irakasleak. Irakaskuntza munduan, beste arlo askotan bezala, norbere habitik burua atera eta inguruan zer dagoen aztertzea onuragarria bihurtzen da jasotako informazioa garatuz gero. Abiapuntu hau izanda, mugikortasun aukeraz baliatu da Xiber Belgikako hezkuntza teknikoaren berri izateko. Eskola bisitatzerako orduan ikasgai teknikoko gela ezberdinak aztertzeaz gain, irakasle ezberdinekin egon da informazioa elkar trukatzen, beraiena jaso eta gurea eskainiz. Bidai honetan informazioa trukatzeaz aparte, sendoagoa bihurtu daitekeen harreman baten sorrera gauzatu da, HETEL eta VLOT! elkarteen arteko elkarlana ahalbidetuz. Abantean!

HETEL ikastetxeetako Erasmus+ ikasleei zuzenduriko Instagram txapelketako irabazlea badaukagu. Zozketaren irabazlea @Rubengma instagram erabiltzailea da, Zabalburu ikastetxeko ikaslea. Zorionak Ruben! Argazki polita! Eskerrik asko parte hartzaile guztiei! Aldi berean, geratzen zaien atzerriko egonaldia ondo aprobetxatu dezaten opa diegu gure Erasmus+ bekadun guztiei. Abantean!

Maiatzak 14-tik 17-ra, Arratiako ZULAIBAR Lanbide Ikastegiko irakasle den Josu Iriarte Arenaza, Palermon izan da HETELen Erasmus + bekaz baliatuta. Bertan beka berarekin dauden ikasleei, praktiken jarraipena egiten, laguntza ematen eta bide batez inguruko enpresak eta lanbide heziketa ezagutzen izan da. Karol SRA zentruan, zuzendariarekin eta bertako langileekin batzartu da, bakoitzaren ikuspuntuak eta jakintzak partekatzeko eta era berean ikasleen balorazio bat jasotzeko. Zuzenean lanean ikusi ahal izan ditu eta ikasleen ikuspuntua jaso. Ikasleen jarraipenaren tarte batean, bertako lanbide heziketa eta lan munduaren artean dagoen lotura, zuzenean ikusi ahal izan du. 30 ikasletik gora jasotzen duen itsasontzien munduko enpresa bat bisitatu du bertako irakasle batekin eta Andaluziako irakasle talde batekin batera. Aurrerantzean metodologien, teknika berrien eta beste hainbat ekintzen berri emateko kontaktuan jarraitzeko konpromisoa hartu dute bi aldeek, ondorioz HETELen sarea aberastuko da eta harreman internazionala sendotuko da, bai SEND agentzia eta Karol SRA enpresekin ere.